Image description
Европын тивийн улс орнууд одоо Хөл хорио, дотоод хязгаарлалтаа сулруулж эхэллээ. Энэ 6-р сараас 12-оос дээш насны хүүхдүүдээ вакцинжуулалтад хамруулахаа Европын олон орон зарлав. Харин 7-р сараас Европын холбоо "вакцины паспорт"-той болох юм байна. 

ФРАНЦ
Энэ улс 6 сарын 9-нөөс “ногоон” ба “шар” жагсаалтад багтсан улс орнуудаас жуулчдыг хүлээн авч эхэлнэ. Гэхдээ Францад Хөл хорио үйлчилж байгаа, зөвхөн оройн 9 цаг байсныг 11 цаг болгож сунгажээ. Зоогийн газар, кафе, баар ажиллана, гэхдээ талбайгаа 50% дүүргэхийг зөвшөөрөв. Харин 1 ширээний ард 6-аас олон хүн сууж болохгүй. Кино театр, музей, хүнсний бус дэлгүүр ажиллаж байгаа, спортын арга хэмжээ зохиохыг зөвшөөрсөн. Засгийн газар 6 сарын 30-наас дотоод бүх хязгаарлалт, хөл хориог цуцлахаар төлөвлөжээ. 

ИХ БРИТАНИ
Англичууд одоо “Шар жагсаалт”-ын орнуудын жуулчдыг таатай хүлээж авахгүй байгаа, 10 хоног тусгаарлагдахаас гадна 2 удаа сөрөг тест шаардаж байна. “Улаан жагсаалт”-ын орнуудаас ирэгсдийг тусгай зочид буудалд тусгаарлах ёстой. Англид одоо зочид буудал, баар, кафе, зоогийн газар  хэвийн ажиллаж байгаа. Уран зургийн галерей, музей, спорт танхим, усан санд заавал хоорондын зайг баримтлах ёстой. Эрх баригчид 6 сарын 21-нээс бүх хязгаарлалтыг цуцлахаар төлөвлөж байна. 

ГЕРМАН
Энд өнгөрсөн оны 11-р сараас Хөл хорио үйлчилж байгаа, одоо ихээхэн суларч эхэллээ. Нийтийн тээвэр, дэлгүүрт заавал маск зүүх ёстой, тэгэхдээ заавал мэс заслын “FFP2” стандартын маск эсвэл клапангүй, “KN95/N95” респиратор шаарддаг. Зоогийн газрууд зөвхөн задгай талбайгаа нээсэн, музей нээлттэй, задгай агаарт концертыг зөвшөөрсөн. Үүний зэрэгцээ хэрэв 100 мянган хүнд ногдох халдвар 50-аас цөөн болбол зоогийн газруудыг дотор танхимдаа хүлээн авахыг зөвшөөрөх юм байна. Сонирхуулахад, Герман улс 12-15 насны хүүхдүүддээ “Pfizer” тарьж байгаа. 

ИТАЛИ
Энэ улс одоо Европын холбоо, Шенгений бүс, Английн жуулчдыг тусгаарлахгүй нэвтрүүлж байгаа. Харин АНУ, Израилийн иргэдийг тусгаарлаж нэвтрүүлнэ. Энд баар, зоогийн газрууд ажиллаж, 1 ширээнд 4 хүн суухыг зөвшөөрнө. Спортын цэнгэлдэх ажиллаж байгаа, гэхдээ 25% дүүргэлттэй байх ёстой. Хөл хорио үдшийн 11 цагаас эхэлнэ, гэхдээ 6 сарын 21-нээс цуцлахаар төлөвлөсөн аж. Италийн 3 нутгийг халдваргүй, “цагаан бүс” гэж зарлажээ. Гэсэн ч тэнд дотор танхимд заавал маск зүүж 1 метрийн зай баримтлах ёстой. Хэрэв халдварын тоо буурвал Ром, Милан зэрэг хэдэн бүсийг халдваргүй гэж зарлахаар төлөвлөж байгаа. 

ДАНИ
Энд бүх дэлгүүр хоршоо, байгууллага нээлттэй. Гэхдээ Засгийн газар нь 15-аас дээш насныханд “коронавирүсийн паспорт” олгож байгаа. Ийм паспортыг цаасан хэлбэрээр авч явахаас гадна утсан дээрээ үзүүлэх боломжтой. Ковидын паспортаа кино театр, музей, үсчин, кафед орохдоо  заавал шалгуулах ёстой. Уг паспортон дээр вакцин тариулсан эсэх, халдвар авч байсан эсэх, сүүлийн 74 цагт тест өгсөн эсэх тухай мэдээлэл бий. 

ГРЕК
Грекийн Засгийн газар одоо вакцинжуулалтад хамрагдсан эсвэл сөрөг тесттэй гадаадын иргэдийг оруулж байгаа. Энд Хөл хорио үйлчилсэн хэвээр, шөнийн 00 цагаас үүрийн 5 цаг хүртэл. Гэхдээ баар, зоогийн газар нээлттэй, зөвхөн 1 ширээнд 6-аас олон хүн сууж болохгүй. Грект олон нийтийн газарт заавал маск зүүх ёстой. Түүнчлэн энд задгай талбайн музей, эртний түүхэн дурсгалт газруудыг нээж эхэллээ. 

ПОЛЬШ
Энд дэлгүүр хоршоо, зоогийн газар, кино театр, зочид буудал ажиллаж байгаа, дүүргэлт 50%. Дотор танхимд заавал маск зүүж, 1,5 м зай баримтлах ёстой. Польш 6 сарын 6-наас спорт танхим, парк, цэнгээний газруудыг нээсэн, хуримандаа 150 хүртэл зочин урихыг зөвшөөрсөн. 

ИСПАНИ
Энэ улс 6 сарын 7-ноос вакцин хийлгэсэн жуулчдыг хүлээн авч байгаа, гэхдээ коронавирүсийн сөрөг тесттэй байх ёстой. Испани бүх дэлгүүр, баар, зоогийн газар, музейг нээсэн, зөвхөн масктай хүнд үйлчилж байгаа. 

БЕЛЬГИ
Энд бүх дэлгүүр хоршоо нээлттэй, харин кафе, зоогийн газрууд зөвхөн задгай талбайд нэг дор 10 хүн хүлээн авч байгаа. Хэрэв эрчим эмчилгээний тасагт ковидоор өвчилсөн хүний тоо 500-гаас доош буувал 6 сарын 9-нөөс ахин Хөл хориог сулруулахаар Бельгийн Засгийн газар шийджээ. Энэ үеэр мөн кафе, зоогийн газрууд дотоод танхимаа ажиллуулах юм байна. 

ПОРТУГАЛ
Португал улс Цар тахлын олон хязгаарлалтыг цуцалсан ч Онц байдлыг 6 сарын 13 хүртэл сунгасан. Энд заавал маск зүүх ёстой. Дэлгүүр хоршоо үдшийн 9 цаг хүртэл ажиллаж байгаа, кафе ба зоогийн газар 1 ширээнд 6 хүнийг суулгаж болно. Энд халдварын тоо буурч байгаа ч жуулчдыг хүлээн авах эсэхээ зарлаагүй байна. 

НИДЕРЛАНД
Энэ улс 6 сарын 5-наас Хөл хориогоо эрс сулруулсан, бараг бүх юмаа нээсэн, гэхдээ жуулчдыг бараг хүлээж авахгүй байгаа. Кафе, зоогийн газар ажиллаж эхэлсэн, гэхдээ 1 ширээнд 4-өөс олон хүн суухгүй. Мөн заавал хоорондын зайг баримтлах ёстой. Айлд зочлох хүмүүсийн тоо 4-өөс олон байж болохгүй. Музей, үзэсгэлэн нээлттэй, гэхдээ дүүргэлтэд хязгаарлалт тавьжээ. Нидерландын ЗГ 6 сарын 30-наас Хөл хоориог цуцлах төлөвлөгөөтэй байна. 

ИРЛАНД
Энэ улс 6 сарын 2-ноос жуулчдад зориулан зочид буудлаа нээсэн, 7-ноос вакцин хийлгээгүй айл өрх зочдыг хүлээн авч эхэлсэн. Баар, зоогийн газрууд онгорхой, гэхдээ 6-гаас олон хүн цуглаж болохгүй. Хуриманд 25 хүртэл зочин урихыг зөвшөөрчээ. ЗГ нь 7 сарын 5-наас Хөл хориог нэмж сулруулах эсэхээ шийднэ.