Сальвадор улс дэлхийд анх удаа биткоиныг албан ёсны төлбөрийн хэрэгсэл болгож зарлав. Энэ улсын Конгресс өчигдөр Ерөнхийлөгч Найиба Букелегийн гаргасан санаачилгыг олонхын саналаар дэмжлээ. 90 хоногийн дараагаас тус шийдвэр хүчин төгөлдөр хэрэгжиж эхэлнэ. Сальвадор улс 2001 оноос хойш цорын ганц валюттай, тэр нь Америк доллар билээ. Одоо энэ улсын ямар ч худалдаа үйлчилгээ, бизнесийн газар тэр бүү хэл жирийн нэг лангуу хүртэл бүгдээр биткоиныг төлбөр үйлчилгээний хэрэгсэл болгон хүлээн авах ёстой болжээ. Мэдээж, ийм шилжүүлэг хийх боломжийг хангасан технологигүй тохиолдолд хууль зөрчсөн болохгүй. Ерөнхийлөгч Найиба Букеле “Манай орны хувьд энэ бол түүхэн алхам, мөн банкны дансгүй иргэдийн хувьд ч гэсэн. Сальвадорын иргэдийн 70% нь банканд дансгүй. Энэ алхам нь хөрөнгө оруулалт, аялал жуулчлал, санхүүгийн инклюзивность, инноваци болон манай орны эдийн засгийн хөгжлийн замыг нээж байна” гэж мэдэгдэв. Сальвадорын эдийн засаг нь гадаадад амьдардаг иргэдийн илгээсэн мөнгөн шилжүүлгээс ихээхэн хамааралтай. Эндхийн 2 сая хүн гадаадад ажиллаж амьдран ар гэр лүүгээ жилд 4 тэрбум гаруй доллар илгээдэг аж. Энэ нь Сальвадорын Дотоодын нийт бүтээгдэхүүний 20%-ийг бүрдүүлдэг.
Сальвадорын Засгийн газрын энэ шийдвэрийг эдийн засагчид янз бүрээр үнэлж байна. Зарим нь үүнийг “Тус орны хувьд эргэлт хийсэн гайхамшигтай амжилт” гэж байхад нөгөө хэсэг нь криптовалютын үнэ ханшны тухайд түгшиж буйгаа илэрхийлэв. “Сальвадор улс ийм шийдвэр гаргаснаар Олон улсын валютын сантай харилцаа муудаж магадгүй. Сальвадор 1 тэрбум доллар авах хүсэлтээ ОУВС-нд гаргасан билээ” гэж тоймчид онцлон тэмдэглэж байна.
0 Сэтгэгдэл