Саудын Араб улсын хөлбөмбөгийн ирээдүйд итгэлгүй байгаа тухай Европын хөлбөмбөгийн нийгэмлэгүүдийн холбооны (UEFA) ерөнхийлөгч Александер Чеферин мэдэгдэв. “Европын топ клубуудын хүчтэй тоглогчид өнөөдөр Саудын Араб улсад очиж байна. Миний бодлоор энэ байдал удаан үргэлжлэхгүй. Ер нь хөлбөмбөгийг хөгжүүлье гэвэл ийм буруу хандлагаас татгалзах ёстой. Европт карьераа бараг дуусгасан алдартай хөлбөмбөгчдийг зөөж аваачлаа гээд хөлбөмбөг хөгжихгүй. Хятад хэдэн жилийн өмнө яг ийм алхмуудыг хийж байсан, гэсэн ч тэдний шигшээ баг Хөлбөмбөгийн ДАШТ-ий шалгаруулалтыг давж чадахгүй л байна. Карлос Тевес бол агуу хөлбөмбөгчин, тэр Хятадад 100 сая долларын гэрээ байгуулж билээ. Өнөөдөр мөнгөний хэмжээ өссөн ч Эрлинг Холанд ба Килиан Мбаппе зэрэг залуу алдартнууд үнэндээ Саудын Араб руу очихыг хүсэхгүй байгаа” хэмээн Чеферин ярилаа. 
Нэмж өгүүлэхэд, Саудын Арабын Мэргэжлийн Лиг энэ зун трансферын хэмжээгээр дэлхийд 2-д орсон. Тэд 956,9 сая еврог шинэ тоглогчдод зарцуулжээ. Нэгт мэдээж Английн Премьер Лиг. Энэ орны клубууд нийтдээ 2,8 тэрбум еврогоор хөлбөмбөгчдийг худалдаж авлаа.