Image description
Оросын тамирчин Евгений Рылов зуны Олимпийн усан спортын нуруугаар сэлэх төрөлд 200 метрийн зайд уралдан ялж алтан медаль хүртсэн төдийгүй Олимпийн дээд амжилт тогтоожээ. Мөнгөн медалийг Америкийн Райан Мерфи, хүрэл медалийг Английн Люк Гринбанк хүртэв. Гэхдээ америк эр тэмцээний дараа хачирхалтай мэдэгдэл хийжээ. “Цэвэр бус тэмцээнд оролцсон явдал миний сэтгэл зүйд дарамт болж байна. Урам хугарч байна, гэхдээ би гараан дээр ирсэн хүмүүстэй уралдах ёстой. Би шийдвэр гаргадаг хүмүүсийг лоббидож чадахгүй, тэднийг буруу шийдвэр гаргасан гэж хэлж чадахгүй” хэмээн АНУ-ын усанд сэлэгч Мерфи ярьжээ. Үүний хариуг Оросын усан спортын хорооны тэргүүлэгч, "Олимпийн нөөц" спорт сургуулийн захирал, Олимп ба дэлхийн олон удаагийн аварга Евгений Коротышкин дор нь барьжээ. “Олимпийн аваргыг ингэж чичлэх нь байж болшгүй үзэгдэл. Манай тамирчин Женя энэ алтыг авах гэж ямар их хөдөлмөрлөж хөлсөө дуслуулсныг бид мэднэ. Тэр нуруугаар сэлэх төрөлд дэлхийн жагсаалтыг 2-3 цикл дараалан манлайлсан. Гэтэл Мерфи дөнгөж одоо л түүнийг анзаарсан бол энэ нь Женягийн биш харин Райаны асуудал” гэж Коротышкин хэллээ. Мөн тэрбээр америкчуудад шүүмжлэлтэй ханддагаа ч нуусангүй.
“Америк тамирчид яаж гараандаа бэлддэгийг бид мэднээ. Сэлэхийн өмнөхөн хүлээх өрөөнд байхдаа тэд бүгдээрээ уушиг руугаа астмын эм чихдэг. Өөр бас юу юуны ч эм гэлээ. Энэ АНУ-ын шигшээ багт дандаа өвчтэй хүмүүс байдаг юм уу? Үүнийг тохиолдол гэж бодохгүй байна. Америкийн шигшээ багийн тамирчдын 70% нь хориотой эмийг хэрэглэх зөвшөөрөлтэй, үүнийгээ албан ёсоор баталгаажуулж ил тодоор хэрэглэдэг. Харин манай Рылов бол Олимпийн аваргыг шударгаар авсан” гэж Е.Коротышкин мэдэгджээ.