Image description
Ковидоор өвчилсөн хүний хөлс эрүүл хүмүүсийнхээс өөр үнэртдэг гэж Таиландын эрдэмтэд мэдэгдлээ. Бангкокийн Чулалонгкорн их сургуулийн эрдэмтэд авсаархан, зөөврийн ковид илрүүлэгч бүтээсэн тухай “AFP” дамжууллаа. Энэ шинэ төхөөрөмж нь хүмүүсийн суганы хөлсийг шинжилж коронавирүсийг хурдан бөгөөд зөв илрүүлдэг аж. “Коронавирүсийн халдвар авсан хүмүүсийн хөлсөнд өвөрмөц, химийн бодисууд агуулагддаг, иймээс онцгой үнэртэй. Үнэндээ тодорхой төрлийн бактериуд ийм үнэрийг ялгаруулдаг юм. Бид өөрийн зорилгод хүрэхийн тулд хүрээлэн буй орчноос хортой бодисуудыг илрүүлдэг төхөөрөмжийг өөрчилж ашигласан” гэж ковид илрүүлэгч төхөөрөмж бүтээгчдийн нэг Чадин Кулсинг тайлбарлав. 
Шинэ төхөөрөмжийн ажиллах зарчим тун энгийн. Хүмүүс ариутгасан хөвөнтэй модыг сугандаа хавчуулж 15 минутын турш байлгана. Дараа нь хөвөнтэй модыг шилэн саванд хийхэд агаарын дээж нь даралтын улмаас вакуум хоолойгоор хий шинжилдэг төхөөрөмж рүү очно. 30 секундын дараа хариу шууд гарна. Шинэ төхөөрөмжийг Бангкок хотын гудамжны зах дээр ажилладаг дэлгүүрийн эзэд дээр туршихад үр дүн нь 95% гарчээ. “Хамар луу гүн шургуулж дээж авахын оронд сугандаа хавчуулах нь илүү амар, таатай” гэж туршлагад оролцогчид сэтгэгдлээ хуваалцав. Харин эрдэмтэд өөрсдийн энэ аргыг өндөр үнэтэй, лабораторийн тоног төхөөрөмж ашигладаг аргаас илүү хямд учир олон нийтэд хүртээмжтэй болно гэж найдаж байна.