Image description
“Microsoft” корпорацийг үндэслэгч, тэрбумтан Билл Гейтс “Дэлхийн улс орнууд шинэ шинэ Цар тахалд бэлэн биш байна, үүнд бэлдэх гэж зохих хүчин чармайлт гаргахгүй байгаа явдалд би нилээд түгшиж байна. Бэлэн гэдэг ойлголтод 100 хоногт багтаан вакцин бүтээх ба түүнээ 100 хоногт үйлдвэрлэж даян дэлхийгээр түгээх боломж, мөн дэлхийн хэрэгцээг хангах вакциныг шуурхай үйлдвэрлэх үйлдвэрлэлийн баазууд багтдаг. Үндэсний эрүүл мэндийн систем, вакцин үйлдвэрлэлд илүү их хөрөнгө мөнгө оруулах хэрэгтэй. Энэ бол асуудлыг шийдэх цор ганц бодит шийдэл, үүнийг хэрэгжүүлэх бүрэн боломжтой” гэж “The Wall Street Journal” сонинд ярилцлага өгөхдөө мэдэгдлээ. Тэрбээр “АНУ-ын Ерөнхийлөгч Жо Байдены захиргаа Цар тахалд бэлдэхээр 65 тэрбум доллар гаргасан нь зөв алхам болсон” гэж ярив. Сануулахад, Билл Гейтс 6 жилийн өмнө дэлхийд учрах хамгийн том алуурчин бол Цар тахал гэж сэрэмжлүүлж байсан юм. 
Дэлхийн улс орнуудад вакцинжуулалт харилцан адилгүй явагдаж, баян ядуу орнуудын тэгш бус байдал улам гүнзгийрч байгааг “Мелинда ба Гейтсийн сан” онцлон тэмдэглэв. Харьцуулахад, 2021 оны эхний хагаст Африк тивд ковидын эсрэг вакцины 49 сая тун тарьсан бол мөн хугацаанд АНУ-ын ганцхан Калифорни 43 сая тун вакцин хэрэглэжээ. Тус сангийн тайланд дурдсанаар Цар тахлын улмаас 2020 онд дэлхийн 31,3 сая хүн ядуурлын туйлд хүрсэн аж. “2021 онд эдийн засаг өсч байгаа ч энэ нь эмэгтэйчүүдэд онц хамааралгүй байна. Цар тахлын өмнөх үе буюу 2019 онтой харьцуулахад энэ жил эмэгтэйчүүдийн ажлын байр 13 саяар багассан, гэтэл эрчүүдийн ажлын байр коронавирүс дэгдэхийн өмнөх үетэй адил болтол сэргэлээ. 2022 онд 1 хүнд ногдох орлогын түвшин дэлхийн хөгжингүй орнуудын 90% -д Цар тахлын өмнөхтэй ижил болсон, гэтэл ядуу ба дундаж орнуудын 30% орчимд л ийм байдал ажиглагдсан. 2030 он гэхэд дэлхийн 700 сая хүн туйлын ядууралд нэрвэгдэнэ” гэж Билл ба Мелиндагийн сан үзэж байна.