Image description
Оросын Төрийн Дум буюу парламентын Доод танхимын сонгуулийн урьдчилсан дүнг тус орны Сонгуулийн төв хороо мэдээллээ. Одоогоор саналын хуудсын 50,02%-г тоолсон ба эрх баригч “Нэгдсэн Орос” нам сонгогчдын 46,11%-ийн саналыг авч тэргүүлж яваа тухай ТАСС агентлаг дамжуулав. Сонгууль 3 өдрийн турш явагдаж нийт 14 нам оролцсон билээ. Хоёрт Коммунист нам 21,40%, гуравт Либерал-Ардчилсан нам 8,07%, дөрөвт “Шударга Орос” нам 7,62%, тавт “Шинэ хүмүүс” 5,97%-тай байна. Бусад нам одоогоор парламентын 5%-ийн босгыг даваагүй. “Москва хотод цахимаар зайнаас өгсөн саналыг тоолох явц доголдож байгаа шалтгааныг тодруулахаар ажиллаж байна” гэж Оросын СЕХ-ны тэргүүлэгч Элла Памфилова мэдэгджээ.
ОХУ-ын Цахим хөгжил, холбоо харилцааны яамын сайд Максут Шадаев “Манай цахим сонгуулийн үеэр олон орон кибер халдлага үйлдсэн. Тэдний 50% нь Америкаас, 25% нь Германаас, үлдсэн нь Өмнөд Солонгос зэрэг бусад улсынх” гэж мэдэгдлээ. Харин тус орны 
парламентын Дээд танхим буюу Холбооны зөвлөлийн спикер Валентина Матвиенко "Манай сонгуулийн үеэр кибер халдлага үйлдсэн орнуудын эрх баригчдад хандаж хакеруудынхаа учрыг олох хүсэлт тавина.... Шаардлагатай гэж үзвэл тэдгээр орны эсрэг хориг арга хэмжээ авна" хэмээжээ.
Сонирхуулахад, Оросын өнөөгийн Төрийн Дум гадаадын 20 гаруй Төрийн бус байгууллагыг (ТББ) өөрийн орны дотоод хэрэгт хөндлөнгөөс оролцсон гэж үзээд үйл ажиллагааг нь хаах саналыг Ерөнхий прокурорын газарт хүргүүлжээ. “Эдгээр ТББ манай сонгуулийн кампанит ажлын үеэр нийгмийн сүлжээ, интернэтээр (Facebook, Twitter, Google...) ард иргэдэд хандан тодорхой зарим хүний төлөө санал өгөхийг уриалж зааварласан.... Сонгуулийн үеэр санаатайгаар худал хуурамч мэдээ мэдээллийг тасралтгүй цацаж түгээсэн.... ОХУ-ын хууль дүрмийг зөрчсөн контентуудаа устга гэсэн шаардлага хүргүүлэхэд үл тоомсорлосон” хэмээн Улсын дотоод хэрэгт гадаад орнууд хөндлөнгөөс оролцсон баримт нотолгоог мөрдөн шалгах Парламентын хорооны дарга В. Пискарёв мэдэгдлээ.