Оросын “Вагнер” цэргийн хувийн компаний бүрэлдэхүүнд багтаж дайнд явсан анхны хоригдлууд 6 сарын гэрээгээ дуусган Украинаас амьд буцаж ирлээ. 20 орчим эдгээр дайчны бүх ял шийтгэлийг хүчингүй болгосон гэж ОХУ-ын төр засаг зарлав. Уг компанийг үндэслэгч, бизнесмэн Евгений Пригожин биечлэн дайчидтай уулзаж гар барин талархал илэрхийлэв. Пригожин “Та нар өөрийн гэрээг бүрэн биелүүллээ, нэр төртэйгээр маш сайн ажилласан. Энэ хорвоо дээр та нар шиг ингэж сайн ажилладаг хүмүүс цөөхөн. Урагшаа давшиж дайснаас огт айлгүй хараа буруулалгүй тулалдсан.. та нар жинхэнэ дайчид. Энэ бол та бүхний хувь ерөөл, тавилан, бас генетик. Та нарын ихэнх нь санамсаргүй эсвэл зан авирын онцлогоос болж өргөст торны цаана суусан.... Хуулийг хэн ч зөрчиж болохгүй ээ.... Нийгэм та нарт боломж өгсөн, одоо харин тэд үндэсний эрх ашгийн төлөө  чин шударгаар тулалдсан та нарт талархаж хүндэтгэж байна. Цагдаа нар ч хүндэтгэх болно” гэж мэдэгдсэнийг “РИА Новости” агентлаг дамжуулав. Тэр энэ үеэр амь үрэгдсэн 52 настай хоригдлыг дурсчээ. Мань хоригдол 30 жил шоронд суусан ба Украинд байлдаж яваад баатарлагаар амиа алдсан юм байна. Экс хоригдлын нэг нь “Би амарсны дараа буцаж заавал ирнэ. Бидний ихэнх нь ийм төлөвлөгөөтэй байгаа. Одоо харин зарим ажлаа дуусгах хэрэгтэй байна. Энэ алба одоо миний амьдрал” гэж ярилаа.