Английн хаан III Чарльзад хорт хавдар гэсэн онош тавьжээ. “Өнгөрсөн 7 хоногт III Чарльз хаан түрүү булчирхайн мэс засал хийлгэсэн. Энэ үеэр хаан хорт хавдар туссан болохыг илрүүллээ. Эзэн хаан даваа гарагаас эмчилгээгээ эхлүүлсэн” гэж Букингэмийн ордон мэдэгдлээ. Гэхдээ чухам юуны хорт хавдар болох, яг ямар үе шатанд яваа тухай тэд мэдээлсэнгүй. Ямартай ч түрүү булчирхайн хорт хавдар биш гэнэ. Эмчилгээний  үеэр албан үүргээ гүйцэтгэхээ түр зогсоохыг эмч нар III Чарльз хаанд зөвлөжээ. Гэвч хаан тэдний зөвлөгөөг дагахыг хүссэнгүй, ажлаа хийж олон нийттэй харьцсаар байх болно гэхдээ тоог нь цөөрүүлнэ гэжээ. Хаан гадуур эмчлүүлэхээр Лондоноос Норфолк гүнлэгийн Сандрингэм ордондоо иржээ. 
Хэрэв 75 настай хаан албан үүргээ гүйцэтгэж чадахаа боливол хууль дүрмийн дагуу “төрийн зөвлөхүүд” ажилдаа орно. Одоогоор ийм зөвлөхийн тоонд хатан хаан Камилла, хунтайж Уильям, гүнж Анна, ханхүү Эдвард багтаж байгаа. Харин ханхүү Харри ба Йоркскийн ханхүү (Эндрю) үүнд огт хамааралгүй. Ханхүү Харри эцэгтэйгээ утсаар ярьсан, удахгүй эх орондоо ирж түүнийг эргэнэ гэж “BBC” агентлаг мэдээлэв. 
Хааны энэ өвчний талаар мэдээлэл түгсний дараа Үндэсний эрүүлийг хамгаалах албаны сайтаас түрүү булчирхайн өвчлөлийн талаар мэдээлэл хайж уншигсдын тоо 1000% нэмэгджээ. Нас ахих тусам энэ өвчнөөр өвчлөх эрсдэл нэмэгддэг аж. ДЭМБ-ын Хавдрын хөтөлбөрийн экс удирдагч, Английн хавдар судлалын тэргүүлэгч эмч, профессор Карол Сикора “Хүмүүс хорт хавдраас их айдаг. Орчин үед энэ өвчнөөр өвчлөгсдийн бараг тал хувийг бид эмчилж чаддаг болсон” гэжээ. 
Нэмж өгүүлэхэд, хааны том хүүгийн эхнэр бас мэс засалд орсон тухай өмнө нь ХМХ мэдээлсэн юм. Хунтайж Уильямын гэргий, Уэльскийн гүнж 42 настай Кейт 1 сарын 16-нд хэвлийн хөндийн мэс засал хийлгэсэн, иймээс 3 сарын сүүл хүртэл албан үүргээ гүйцэтгэхээ түр завсарлажээ. 
#МЦогзолмаа орчуулав.