Хятад гүрний эрх баригчид хүн амынхаа биеийн жинг хянах 3 жилийн кампанит ажил өрнүүлсэн тухай “Синьхуа” агентлаг мэдээлэв. Эрүүлийг хамгаалах төрийн зөвлөл болон Боловсролын яам, Иргэний захиргааны яам зэрэг нийт 16 яам, агентлаг хамтарч 6 сарын 26-нд гаргасан баримт бичигт “Энэ жилээс эхлэн 3 жилийн турш Хятадын хүн амын биеийн жинг хянах аятай, таатай орчинг бүрдүүлэх, биеийн жинг хянах олон аргачлалын талаарх ард иргэдийн мэдлэгийг эрс дээшлүүлэх, амьдралын эрүүл хэв маягийг өргөн сурталчилж нэвтрүүлэхэд чиглэсэн олон арга хэмжээ авах болно.... Зарим бүлгийн хүмүүс хэвийн бус биеийн жинтэй буй нөхцөл байдлыг сайжруулах шаардлагатай байгааг онцлон тэмдэглэж байна.... Жирэмсэн эхчүүд, нялх болон бага насны хүүхдүүд, оюутнууд, ахмад настнууд болон зарим мэргэжлийн хүмүүсийн жинг хянахад онцгой анхаарах ёстой... Биеийн жин бол хүмүүсийн эрүүл мэндтэй нягт холбоотой... Илүүдэл жин, таргалалт нь зүрх судасны өвчин, диабет болон зарим төрлийн хорт хавдар тусах гол хүчин зүйлийн нэг болж байна. Ард иргэдийн биеийн жинг хянах манай энэ кампанит ажлын зорилго бол эдгээр өвчнөөс урьдчилсан сэргийлэх, өвчний шинж тэмдэг дөнгөж илэрмэгц хяналтанд авч хүмүүсийн эрүүл мэндийг дэмжих. Түүнээс биш зүгээр л өвчнийг эмчлэх хангалтгүй... Түүнээс гадна хэт бага жинтэй, хоол хүнсний хомсдолд орсон хүмүүс мөн энэ хяналтад хамрагдана” хэмээн дурджээ. 
Эрх баригчид түүнчлэн ажилтнуудаа дасгал гимнастик, спортоор хичээллэхэд зориулан орчин нөхцөл, дэд бүтцийг бүрдүүлэх, зохион байгуулахыг Ажил олгогчдод хандан уриалжээ. “Кампус бүр эрүүл хоолтой гуанз, зоогийн газрыг олноор байгуулж давс, саахар, өөх тос ихээр агуулсан хүнсийг зарахаас зайлсхийх хэрэгтэй.... Сургууль, дээд боловсролын байгууллагууд өдөр тутам хичээлийн үеэр болон дараа нь заавал 1 цагаас багагүй хугацаагаар биеийн дасгал хийлгэх зэргээр суралцагчдыг хөдөлгөөнтэй байлгах төлөвлөгөө гаргаж хэрэгжүүлэх ёстой... Энэ кампанит ажлын үеэр Хятадын уламжлалт анагаах ухааны туршлагыг ашиглах нь маш чухал” гэж дээрх баримт бичигт зөвлөсөн байна. 
#МЦогзолмаа орчуулав.