---Германы Зүүний намын улстөрч, Бундестагийн депутат, эдийн засгийн ухааны доктор Сара Вагенкнехтийн “Junge Welt” сонинд бичсэн нийтлэлээс---
...НАТО өөрөө шууд оролцохгүй л бол Украин өөрийн хүссэн зорилгодоо хүрэх нь юу л бол. Иймээс Өрнөд маш хүнд бодлого бодох хэрэгтэй боллоо....
....Украины эрх баригчдын зэр зэвсгийн шунал хязгааргүй бололтой. АНУ, Германы хоёр “Leopard” ба “Abrams” танкуудаа Украинд шилжүүлэх тухай бараг л зарлаж дуусаагүй байтал Зеленский одоо бүр байлдааны сөнөөгч онгоцууд, пуужин нэхэж шаардаж байна.
Канцлер Олаф Шольц уг нь байлдааны онгоцуудаа нийлүүлэхгүй гэсэн, бас Хуурай замын цэргийн ангиудаа илгээхгүй гэж мэдэгдсэн. Гэхдээ түүний үгэнд итгэж болохгүй. Яагаад гэвэл, тэр хэд хэдэн удаа “улаан шугам” тогтоосноо өөрөө түүнээ зөрчсөн дөө. Тиймээс НАТО-гийн ерөнхий нарийн бичиг Столбенберг ба Зеленский хоёр “F 35” бөмбөгдөгч онгоцуудыг нийлүүлэх тухай анхны хэлэлцээрээ одоо хийж байж магадгүй. Үүний зэрэгцээ АНУ ба Франц аль хэдийн өөрсдийн байлдааны сөнөөгч онгоцуудыг илгээхэд бэлэн гэдгээ зарлачихсан....
Ямартай ч Украин бол НАТО-гийн шууд оролцоогүй өөрийн зорилгод хүрч чадахгүй. Иймээс Өрнөд нэг бол Украины ялалтын төлөө “орос рулётка” тоглож цөмийн дайны эрсдэлд орох уу, эсвэл АНУ, НАТО хоёр гэнэт ухаан сэхээ орж "Зөвшилцөлд хүрч энхийн гэрээ байгуул" гэж Киевт дарамт үзүүлэх үү гэдгээ шийдэх цаг ирлээ....
Энэ ертөнц маань өдгөө Дэлхийн дайн, цөмийн сүйрэлд хүргэж болзошгүй тун осолтой замаар явж байна. Хэрэв Өрнөд дайн дажин дэгдээхээр шийдэх юм бол ардчилал ба үг хэлэх эрх чөлөө зэрэг үнэт зүйлсээ золиослох хэрэг гарна, гэтэл тэд чухам үүгээр л дайн байлдааны ажиллагааг зөвтгөж ирсэн билээ. Ёроолгүй ангал руу хийх ийм алхам Германы хүн амаас дэмжлэг хүлээх нь юу л бол, хэдий хэвлэл мэдээллийн хэрэгслээр байнга сурталчилж "толгойг нь угааж" байгаа ч гэсэн.
Орчуулсан #МЦогзолмаа