“Манай орон байгалийн баялгаа зарж олсон өндөр орлогын зарим хэсгийг Украинд цэргийн тусламж болгож илгээхээр шийдвэрлэсэн......Энэ бол зөв алхам гэж бид үзэж байна. Украиныг ялагдуулахгүй байлгах нь манай үндэсний эрх ашигт нийцэж байгаа... Норвег одоо эрчим хүчний түүхий эдээ борлуулж асар өндөр ашиг олж байна” гэж Норвег улсын Ерөнхий сайд Йонас Гар Стере мэдэгдлээ. Гэхдээ тэр чухам хэдий хэр хэмжээний мөнгөний тухай яригдаж байгааг тодруулсангүй. Дашрамд дурдахад, Украин-Оросын дайны нөлөөгөөр өнөөдөр дэлхийн зах зээл дээр нефть, байгалийн хийн үнэ их өсч улмаар Норвегийн сан хөмрөг улам баяжиж байгаа. 2022 оны эцсийн дүнгээс үзэхэд Норвег улсын нефть-хийн салбарын орлого бүр 200% өсч 89,3 тэрбум долларт хүрчээ. Түүнээс гадна Норвегийн Татварын алба “2022 онд нефтийн татварын мөнгө 884 тэрбум норвег крон болсон, энэ бол 2021 оныхоос 3 дахин их (296 тэрбум). Өмнө нь хэзээ ч ийм их мөнгө нефтийн компаниудаас орж ирж байгаагүй” гэж мэдэгдлээ.
Норвег түүнчлэн Украины дайны уршиг дагаврыг арилгахад хөрөнгө мөнгө зарцуулахаа зарлав. Өөрөөр хэлбэл, норвегчууд нилээд хэмжээний мөнгийг Африк болон Ойрхи Дорнодын орнуудад нүүрлэсэн өлсгөлөнтэй тэмцэхэд зориулах аж. "Эдгээр арга хэмжээ Норвегийн эдийн засагт сөрөг нөлөөлөхгүй" гэж Ерөнхий сайд Гар Стёре амлажээ.