Японы парламент 72 жилийн түүхэндээ анх удаа нэгэн депутатын бүрэн эрхийг цуцалж хөөн явуулсан тухай “Kyodo News” агентлаг мэдээлэв. Дээд танхимын депутат Ёсикадзу Хигаситани сонгогдсоноос хойш нэг ч удаа хурал чуулганд суугаагүй аж. Гэсэн хэрнээ мань эр цалин гэж 19 сая иен (140 мянган доллар) авчээ. Түүнийг парламентаас хөөхийн төлөө 235 хүн санал өгч, 1 нь эсэргүүцэв. Хигаситани  парламентын хуралд суугаагүйнхээ төлөө уучлал гуйсан бичлэг илгээсэн ч парламентын Дээд танхим хүлээн авсангүй, заавал биечлэн ирэхийг шаарджээ. 
Ёсикадзу Хигаситани бол цөөхөн гишүүнтэй “Сэйдзика дзёси 48 то” (Эмэгтэй улстөрчдийн нам 48) намаас 2022 онд парламентад сонгогджээ, тус намыг өмнө нь “NHK” гэж нэрлэдэг байв. Намын гол зорилго нь Японы том телевиз, радионы төлбөрийг албан журмаар авахыг эсэргүүцэх. Түүнээс гадна Хигаситани бол алдартай YouTube-блогч, нууц нэр нь GaaSyy. Хигаситани өөрөө Дубайд амьдардаг, ба Японд ирэхээс зайлсхийдэг. Яагаад гэвэл луйврын хэргээр шоронд орж магадгүй. Тэрбээр алдарт “BTS” K-POP групптэй уулзуулж өгнө гэж япончуудад амлаж их мөнгө аваад өөрөө идчихсэн юм байна. Японы Цагдаагийн газар түүнчлэн экс депутат Хигаситанийг цуу яриа тараасан, мөнгө шантаажилсан хэргээр өмнө нь дуудсан ч ирээгүй, тиймээс 2023 оны 1-р сард түүний гэрт нэгжлэг хийжээ. 
Орчуулсан #МЦогзолмаа