ОХУ-ын нийслэл Москвад Орос, Хятадын хэлэлцээр явагдаж дууслаа. Талууд 2 орны Иж бүрэн түншлэл, стратегийн харилцан үйлчлэл ба харилцаагаа улам гүнзгийрүүлэх тухай хамтарсан мэдэгдэл (10 хуудас) гаргаж эдийн засгийн хамтын ажиллагааны гол чиглэлүүдийг 2030 он хүртэл хөгжүүлэх төлөвлөгөөгөө танилцуулав. "Манай 2 орны харилцаа түүхэнд байгаагүй хамгийн өндөр, дээд түвшинд хүрч үргэлжлэн хөгжсөөр байна. Бидний харилцаа бол цэрэг-улстөрийн эвсэл холбоо биш, гуравдагч орнуудын эсрэг чиглээгүй... Олон туйлт дэлхийн дэг журам бүрэлдэн тогтох явц түргэслээ... “Дээд ардчилал” гэж байхгүй. Хүний эрхийг хамгаалах тал дээр улс орон бүр өөрийн хөгжлийн замыг бие даан сонгох эрхтэй. Өөр өөр соёл иргэншил, улс орнууд харилцан бие биеэ хүндэтгэж хүлээн зөвшөөрөх ёстой. Улс орны дотоод хэрэгт хөндлөнгийн хүч оролцохыг бид эсэргүүцдэг... Орос, Хятад хамтарч далай тэнгист, агаар тэнгэрт тогтмол эргүүл хийж 2 орны Зэвсэгт хүчний харилцан итгэлцлийг улам нэмэгдүүлнэ.... Шинжлэх ухаан, техник, эрүүл мэндийн зэрэг салбарт хамтарч үсрэнгүй судалгаа шинжилгээ явуулахад хүчин чадлаа төвлөрүүлнэ... 
Дэлхийн нэг ч орон бусад орны аюулгүй байдлыг золиослон байж өөрийн аюулгүй байдлыг хангах ёсгүй. Цөмийн дайнд ялагч гэж байхгүй, ийм дайн хэзээ ч дэгдэх ёсгүй. Хамтын мэдэгдэлд гарын үсэг зурсан орнуудад бид хандаж гол зарчмуудыг амьдрал дээр дагаж мөрдөхийг уриалж байна. 
Цөмийн гүрнүүд атомын зэвсгээ өөрийн нутаг дэвсгэрийн гадна байрлуулж болохгүй, гадаадад байршуулсан цөмийн зэвсгээ эгүүлэн татах ёстой" хэмээн хамтарсан мэдэгдэлд дурджээ. 
ОХУ-ын Ерөнхийлөгч Владимир Путин “Манай 2 орны хэлэлцээр амжилтай, үр дүнтэй явагдлаа. Орос-Хятадын харилцаа түүхэнд байгаагүй өндөр түвшинд хүрлээ. ... Хятадын энхийн төлөвлөгөөний заримыг авч Украины зөрчлийг зохицуулахад ашиглаж болох юм, мэдээж Өрнөд ба Киев үүнд бэлэн болсны дараа. ...Англи улс ядууруулсан урантай зэвсгээ Киевт нийлүүлэх болсноос үзэхэд Өрнөд ам хэлээр биш бодит амьдрал дээр сүүлчийн украин амь тавьтал ОХУ-тай дайтахаар шийджээ. Олон улсын ихэнх асуудлын тухайд Орос, Хятадын байр суурь адил төстэй байгаа. “Сибирийн хүч 2” байгалийн хийн хоолойн тухайд Монгол Улстай бүх хэлэлцээрийг хийж тохирсон. Орос түүгээр жилд 50 тэрбум м3 хий нийлүүлнэ, улмаар Хятадад экспортлох байгалийн хий нэмэгдэх юм.... Ази, Африк, Латин Америкийн орнуудтай тооцоо хийхдээ хятад юань ашиглахын төлөө байгаагаа бид илэрхийлсэн... Хятадад нийлүүлж буй шингэрүүлсэн нефтийн хийн хэмжээг Орос улам нэмэгдүүлэх болно. Москва нефтиэ тасралтгүй нийлүүлэхэд бэлэн. Оросын бизнесийн салбар өдгөө Хятад орны өсөн нэмэгдсээр буй эрчим хүчний эрэлт хэрэгцээг бүрэн хангах боломжтой. Орос-Хятадын бараа эргэлт түүхэн дээд амжилт тогтоож 185 тэрбум доллар болжээ. Орос улс түүнчлэн Хятадад мах, үр тариа экспортлох хэмжээгээ эрс нэмэгдүүлж чадна. 2 орны хөдөө аж ахуйн бүтээгдэхүүний худалдаа маш эрчимтэй өсч байгаа. Хятад бол манай Алс Дорнодыг эзэмших гол түнш болсон. Орос- Хятад хоёр Хойд мөсөн далайн замыг хөгжүүлэх хамтарсан байгууллага байгуулахад бэлэн... Шанхайн хамтын ажиллагааны байгууллагын хүрээнд спорт нийгэмлэг байгуулах санаачилгыыг бид дэмжиж байгаа. Москва, Бээжин ирээдүйд Мэдээллийн технологи, Хиймэл оюун, сүлжээний аюулгүй байдал зэрэг салбарт дэлхийд тэргүүлэх боломжтой. Оросоос явсан фирм, компаниудыг орлох Хятадын бизнесийг Орос дэмжинэ. Ковидын улмаас цуцалсан “Оюутнуудын солилцоо” хөтөлбөрийг олон дахин нэмэгдүүлнэ” хэмээн мэдэгдэв.
Харин Хятадын тэргүүн Ши Жинь Пин “Анд нөхөр Путинтэй хийсэн уулзалт, ил тод бөгөөд найрсаг нөхөрсөг байсан. Хятад-Оросын харилцаа бол дэлхийн өнөөгийн дэг журамд амин чухал ач холбогдолтой. Бараа эргэлт өссөний дүнд Хятад ба Оросын нийгэм-эдийн засгийн хөгжил хурдаслаа. Бид НҮБ-ын дүрмийг удирдлага болгодог ба Украины хямралын тухайд хөндлөнгийн ажиглагчийн байр сууринаас ханддаг. Украины зөрчлийг зохицуулах асуудлын тухайд Хятад маань энх тайван, харилцан ярианы төлөө байгаа. Хятад, Орос 2 НҮБ-ын Аюулгүйн зөвлөлийн байнгын гишүүний тухайд цаашид ч олон улсын харилцааны суурь дүрмийг баримтлахын төлөө тэмцдэг.... Манай 2 орон олон туйлт дэлхийг бүрдүүлэхийн төлөө хүч чадлаа улам нэмэгдүүлэх болно. Худалдаа болон IT салбар, баялгийн борлуулалтад цогц төлөвлөлтийг хэрэгжүүлнэ" гэж хэлжээ. 
Орчуулсан #МЦогзолмаа