Ерөнхий сайд Л.Оюун-Эрдэнийн зүгээс "Ерөнхий сайдад итгэл хүлээлгэх тухай" гэсэн УИХ-ын тогтоолыг санаачилж, өргөн барихад бэлэн боллоо.

Харин тус тогтоол хоёр заалттай байх аж.

Эхнийх нь, "Зорьсон ажлаа хариуцлагын зарчимд тулгуурлан хэрэгжүүлэх шаардлагыг харгалзан Ерөнхий сайд Л.Оюун-Эрдэнийн тэргүүлсэн хамтарсан Засгийн газрын бодлогыг дэмжиж, итгэл хүлээлгэх" заалт аж.

Харин хоёр дахь нь тус тогтоолыг дагаж мөрдөх хугацааг зохицуулах юм байна.

Харин ийм тогтоол оруулж ирж буй шалтгаанаа үндэслэл хэсэгт хэрхэн тайлбарлах нь анхаарал татаж байгаа юм.

Хамтарсан Засгийн газрын гэрээнд “...улс төрийн нөхцөл байдал үүссэн тохиолдолд талуудын намын төлөөллийн төв байгууллагаар хэлэлцэж эцэслэн шийдвэрлэнэ” гэж заасан байдаг аж. Энэ дагуу МАН-ын Бага хурлаас "...хамтарсан Засгийн газрын гэрээг зөрчсөн улс төрийн намыг оролцуулахгүйгээр Засгийн газрыг бүрдүүлэх" шийдвэр гаргасныг дурджээ.

Ингэснээр, улс төрийн нэр бүхий хүчин (Ардчилсан нам гэж нэр заагаагүй) ЗГ-аас гарах нөхцөл үүсчихлээ. Иймд Ерөнхий сайд хамтын хариуцлагын зарчим барьж, УИХ-ын бүрэн эрхийг хүндэтгэж, итгэл үзүүлэх асуудлыг УИХ-аар хэлэлцүүлэх нь зүйтэй гэж үзсэн талаар тайлбарласан байна.

Өөрөөр хэлбэл, хамтарсан Засгийн газарт гурван нам орж, ижил эрх үүрэг хүлээсэн. Үүнийг УИХ-аар баталгаажуулж, дэмжсэн. Атал нэг нам (МАН) нь дангаар асуудлыг хэлэлцэж, нөгөө намаа гаргана гэж шийдвэрлэвэл хуулийн зөрчил болно. Нэг үгээр УИХ-ыг алгасаж, эрх баригч нам толгойлон шийдсэн процесс болж үлдэнэ.

Иймд, товчхондоо Бага хурлын шийдвэрийг л УИХ-аар оруулъя гэсэн агуулга юм байна. Бага хурал дээр илэрхийлж байсан, "Хамтарсан Засгийн газар үлдвэл би үлдье. Хэрэв аль нэг намыг гаргавал би огцоръё" гэдэг үндэслэлээ УИХ-аар хэлэлцүүлэх аж.

Энэ томъёоллоо л тогтоолын төслийн эхний заалт болгон оруулж өгчээ. "Ерөнхий сайд Л.Оюун-Эрдэнийн тэргүүлсэн ХАМТАРСАН ЗАСГИЙН ГАЗАРТ ИТГЭЛ ХҮЛЭЭЛГЭХ" гэсэн өгүүлбэр бий учир, асуудал Л.Оюун-Эрдэнийг үлдээх эсэх бус, хамтарсан Засгийн газрыг үлдээх эсэх тухай болж таарч байна.

УИХ-аар ороогүй нөхцөлд, МАН-ын Бага хурлын шийдвэрээр хамтарсан Засгийн газрын агуулгыг шийдвэл Л.Оюун-Эрдэнэ Ерөнхий сайдын хувиар биш намын даргын хувиар огцрох хуулийн үндэслэл бий.

Өнөөдрийн Засгийн газрын хуралдаанд Л.Оюун-Эрдэнэ кабинетын зарчим баримталж, бүх сайдын байр суурийг ээлжлэн хоёр цагийн турш сонсжээ. Өнөөдөр Гадаад харилцааны сайд Б.Батцэцэгээс бусад бүх сайд хуралдаанд оролцсон байна.

Холбогдох хуулийн үндэслэлүүд:

Үндсэн хуулийн Дөчин нэгдүгээр зүйлийн 1 дэх хэсэг, “Ерөнхий сайд Засгийн газрыг удирдаж, төрийн хууль биелүүлэх ажлыг Улсын Их Хурлын өмнө хариуцна”

Монгол Улсын Засгийн газрын тухай хуулийн 24 дүгээр зүйлийн 1 дэх хэсэг, “Засгийн газар Улсын Их Хурлын итгэлийг хүлээсэн байвал зохино”.

АН-ын зүгээс УИХ хэрхэн шийдэхээс үл хамаарч, хамтралаас гарна гэдгээ мэдэгдчихээд байгаа билээ.