Израиль ба Германы эрх баригчид маргалдаж сүүлдээ өнгөрсөн түүхээ сөхөлцсөн тухай Израилийн телевизийн 13-р суваг мэдээллээ. Израилийн Ерөнхий сайд Биньямин Нетаньяху ба Германы Гадаад харилцааны сайд Анналена Бербок нар Гаазын зурваст үүссэн хүмүүнлэгийн хямралын тухай эхлээд маргалджээ. ГХ сайд Бербок “Палестинд хүүхдүүд өлсч зүдэрч байна, өлсгөлөн хүүхдүүдийн зурагтай танилц” гэхэд ЕС Нетаньяху “Гаазын зурваст зах зээл болон наран шарлагын газрууд хэвийн ажиллаж буй зургийг өөрөө хар” гэж хариуллаа. Изралийн тэргүүний үзэж буйгаар тэнд ямар ч өлсгөлөн байхгүй, өлсч буй хүүхдүүдийн тухай  мэдээ бол хэтрүүлэг гэнэ.
Германы Гадаад харилцааны сайд Бербок үүний хариуд “Гаазын зурвасын бодит нөхцөл байдлыг үл харуулах тиймэрхүү зургаа түгээхгүй байхыг уриалж байна” гэлээ. Гэтэл Ерөнхий сайд Нетаньяху дуугаа өндөрсгөн Германы өнгөрсөн түүх, нацистуудын тухай түүнд сануулав. “Тэр л бодит байдал. Нацистууд  тэгэхэд зохиомол худал жүжиг тавьсан гэж харагдахгүй байна. Бид ямар бодит байдлыг гуйвуулж зохиомол дүр зургийг бүтээсэн нацистууд биш дээ” гэж Израилийн Ерөнхий сайд хашгирчээ. “ЕС Нетаньяху бөөнөөр хорих үхлийн лагериудын аймшигт үнэнийг нуусан нацистуудын тухай ингэж сануулсан бололтой” гэж 13-р телевиз онцоллоо.  
Израилийн ТВ-н энэ нэвтрүүлэг Германд бөөн шуугиан тарьсан тухай “Spiegel” сонин бичжээ. 
Нэмж өгүүлэхэд, Гаазын зурвасын “Камаль Адван” эмнэлэгт 3 сард 10 хүүхэд өлсгөлөнгөөр нас барсан тухай өмнө нь Дэлхийн эрүүл мэндийн байгууллагын ерөнхий захирал Тедрос Аданом Гебрейесус мэдээлсэн билээ. Түүнчлэн Гаазын зурвасын эмнэлгүүдэд хоол хүнс хүрэлцэхгүй байгаагаас гадна түлш, эм тариа дутагдаж буй талаар ДЭМБ-ын шинжээчид мэдэгдсэн юм. 
МЦогзолмаа орчуулав.